Сайтка кириу

Дәри өнимлери ҳәм медицина буйымлары баҳасын тийкарсыз рәўиште асырыў – Фармацевтика жумысын тоқтатып қойыўға себеп болады

Соңғы ўақытларда шет еллерде, атап айтқанда Қытай Халық Республикасында қәўипли жуқпалы вирус пенен кеселлениў жағдайы анықланғанлығы себепли Республикамыз дәриханаларында медицина нықапларының(маска) жетиспеўшилиги жүзеге келип атырғанлығы ҳәм оның усақлап сатыў баҳасы жоқарылап кеткенлиги, сондай-ақ, жөтел, грипп ҳәм аязға қарсы, иммунитетти беккемлеўши ҳәм жас-өспиримлерге мөлшерленген дәри-өнимлериниң усақлап сатыў баҳасында да өсиў жағдайы бақланғанлығы бойынша социаллық тармақларда хабарлар тарқалмақта.

Өзбекстан Республикасы Президентиниң 2016-жыл 31-октябрьдеги «Халықты дәри өнимлери ҳәм медицина буйымлары менен тәминлеўди жәнеде жақсылаўға қаратылған илажлар ҳаққында»ғы қарарына тийкар шеттен алып келинетуғын сондай-ақ, мәмлекетимизде ислеп шығылған дәри өнимлери ҳәм медицина буйымларын усақлап ҳәм көтере сатыў – оларды жеткерип бериўде қатнасыўшылар санына қарамастан көтере саўдасы ушын сатып алынған баҳасынан 15 пайыздан, усақлап сатыў саўдасы ушын көтере саўда баҳасынан 20 пайыздан артық болмаған муғдарларда шекленген саўда үстемелери қолланылған ҳалда әмелге асырылыўы белгиленген.

Өзбекстан Республикасы Монополияға қарсы гүресиў комитети жанындағы Тутыныўшылар ҳуқықларын қорғаў агентлиги өз ўәкиллиги шеңберинде дәри өнимлери ҳәм медицина буйымлары ушын белгиленген көтере ҳәм усақлап сатыў саўда үстемелерине әмел қылыныўы үстинен қадағалаўды әмелге асырады.

Өз нәўбетинде тийисли түрде (бир жыл даўамында 2 яки оннан артық) лицензия талаплары ҳәм шәртлери, сондай-ақ, дәри өнимлери ҳәм медицина буйымларына баҳаны белгилеў тәртиби, рецепт тийкарында берилетуғын ҳәмде электрон саўдасы арқалы дәри өнимлери ҳәм медицина буйымларды усақлап сатыў тәртибиниң бузылыўы – лицензия талаплары ҳәм шәртлериниң қопал тәризде бузылыў жағдайы есапланады ҳәмде бул фармацевтика жумысы ушын берилген лицензияның әмел қылыўының белгиленген тәртипте тоқтатылыўына алып келеди.

Сол себептен, фармацевтика тараўында жумыс алып барыўшы исбилерменлерден дәри өнимлери ҳәм медицина буйымларына баҳа белгилеў тәртибине, лицензия талаплары ҳәм шәртлерине қатаң бойсыныўын сораймыз.

Ҳүрметли тутыныўшылар егерде Сизлерде жоқарыдағы жағдайларға байланыслы ҳуқықларыңыз бузылса, Қарақалпақтан Республикасы Монополияға қарсы гүресиў комитетине яки Комитеттиң 222-30-11 «Исеним телефоны» арқалы мүрәжат етиўиңизге болады.

 

Қарақалпақтан Республикасы

Монополияға қарсы гүресиў комитети.